بودجه بندی کیدو (یا پلان پیسه) شیموره اجازه مدیه که پیسایی ره که د خانوار شیم مه یه یا موره ببنید. ای کمک مونه که پیسه خوره مدیریت کیده و بلده چیزایی که ضرورت دیرین پس انداز کنید.
بودجه بندی چی رقم انجام موشه
یک «بودجه بندی» رقم یک پلان استه که مقدار پولی که د خانوار شیم مه یه یا موره نشان مدیه. ای می تینه هفته ای، دو هفته ای یا ماهانه باشه.
پلان پیسه شیم بلده شیم نشو مدیه که چی چیزی بلده شیم مهم استه. ازو باد شیمو می تنید چیزایی ره که ضرورت ندرید کم کنید و بلده چیزایی که ضرورت دیرید پس انداز کنید.
آیا شمو بودجه بندی مونید
بلده شروع کیدو اینی مراحل ره انجام بدید.
بلده ازیکه ای کار آسوتر شونه، simple money manager ره بیگرید که حساب کتاب ره بلده شیم انجام بدیه.
1. پیسایی ره که امدنی استه حساب کید
پیسایی که د خانوار شیم مه یه (درآمد) خوره حساب کید، مثلی:
- تنخای کار شیم
- تقاعدی یا پیسایی که از سنترلنک میگرید
بلده پیدا کیدون ای مالومات، د روی ورق تنخاه (pay slips)، بانکداری آنلاین یا بیانیه بانکی خو توغ کید.
2. پیسایی ره که خرچ مونید لیست کید
پیسایی ره که خرچ مونید (مصرفا)، مثل هزینای زندگی، بل و پرداخت قرضداری:
- مصرفای هفته ای مثل غذا، خوراکه، ترانسپورت
- بل های همیشگی مثل رهن خانه، برق، تلفون، پرداخت اعتباری، بیمه
- مصرفای کمتر مثل لباس، فیس مکتب، راجستر موتر، مصرفای داکتری
بانکداری آنلاینی یا بیانیه بانکی، بل و بیانیه های کارتای اعتباری خوره توغ کید. متوجه باشید که ای مصرف بلده چیز استه، چی مبلغ و چی وقت پرداخت کنید.
3. پیسه امدنی و رفتنی ره مقایسه کید
لیست درآمد و مصرفای خوره مقایسه کید.
اگه مصرف شیم از درآمد شیم کیده زیادتره - وقت شی استه که یک تصمیم بیگرید. د باره ازی چیزا فکر کید:
- «ضرورتا» (چیزایی که بدون ازو گزاره نمی تنید)
- «خواسته ها» (حد اقل بلده یک مدتی بدون ازی چیزا گزاره کیده می تنید)
تصمیم بیگرید که چی چیزا ره می تنید کم کنید یا دیگه بلده شی پیسه مصرف نکنید. واقع بین باشید - یک پلانی جور نکید که انجام ددون شی بلده شیم سخت باشه.
یکدفه که ای مصرفا ره کم کدین، پیسه مصرف خوره از پیسه درآمد خو کم کید.
هر مقداری که باقی مند مبلغی استه که میتنید پس انداز کنید.
4. هدف پس انداز خوره تعیین کید
تعیین کیدون یک هدف پس انداز احساس خوب دیره و شیموره کمک نه که توجه دشته شید.
فرق نه نه که هدف شیم به چی اندازه کلان یا ریزه باشه، فقط شروع کید. حتی اگه کم کم هم پس انداز کنید، د مرور زمان پیسه زیاد جم موشه.
بودجه خوره طوری جور کید که بلده شیم کار کنه
مصرفای خوره از پس انداز خو جدا کید
بلده ازی چیزا کوشش کید که حساب بانکی جداگانه جور کید:
- مصرفای روزانه و بل ها
- پس انداز
اگه می تنید، یک مقدار پیسه خوره د روزی که تنخای خو میگرید به صورت منظم د حساب پس انداز خو ریی کید. ای رقم، بدون ازیکه د باره شی فکر کنید پس انداز نید.
بلده تعیین کیدون ازی اگه کمک د کار دیرید از صاحب کار، دوست یا فامیلای خو پرسان کنید.
بل های خوره د مقدار کم کم پرداخت کید
بلده ازیکه بل خوره کم کم (قسطی) پرداخت کنید قد ارائه دهنده خدمات، مثل برق یا گاز د تماس شید.
بلده ازیکه قد یک بلِ زیاد شوکه نشنید، شاید بتنید کم کم هر دوهفته یا هر ماه پرداخت کنید.
اگه از سنترلینک پیسه میگرید، می تنید از خدمات مفت Centrepay ازونا استفاده کیده ای کار ره انجام بدید.
اگه ضرورت باشه کمک دریافت کید
کمک مفت قابل دسترس استه، اگه ضرورت دشته شید:
- بلده کمک د زیبون خود خو، به خدمات ترجمانی شفاهی و کتبی TIS National د شماره 131 450 زنگ دید. اونا یک ترجمان گرفته د خدماتی که شیمو از شی کمک د کار دیرید زنگ خاد زد.
- بلده کمک د حل کیدون مشکلاتای پولی، د خط کمکی ملی قرضداری د شماره 1800 007 007 زنگ دید. ای خط کمکی از روز دوشنبه تا جمعه ازساعت 9:30 صبح تا 4:30 پاسی روز وازه.