ဩစတေးလျနိုင်ငံတွင် ငွေကြေးစနစ် အလုပ်လုပ်ပုံနှင့် အလုပ်လုပ်ခြင်း အကြောင်းကို နားလည်ပါ။

သြစတြေးလျနိုင်ငံတွင် ‌ငွေကြေးသုံးစွဲခြင်း

ဩစတေးလျငွေကြေးစနစ်

ဩစတေးလျနိုင်ငံတွင် သြစတြေးလျ ဒေါ်လာ (AUD) ကို သုံးပါသည်။ တစ်ဒေါ်လာ (၁ ဒေါ်လာ) သည် ဆင့် ၁၀၀ နှင့် ညီမျှသည်။

သြစတြေးလျဒေါ်လာနှင့် ဆင့်များသည် ငွေစက္ကူ သို့မဟုတ် ဒင်္ဂါးများအနေဖြင့် ရှိပါသည်-

• ငွေစက္ကူ - ၅၊ ၁၀၊ ၂၀၊ ၅၀ နှင့် ၁၀၀ ဒေါ်လာ
• ရွှေဒင်္ဂါးများ - ၁ ဒေါ်လာနှင့် ၂ ဒေါ်လာ
• ငွေဒင်္ဂါးများ - ၅၊ ၁၀၊ ၂၀ နှင့် ၅၀ ဆင့်

ဒစ်ဂျစ်တယ်ငွေကြေး

သြစတြေးလျနိုင်ငံသည် ဒစ်ဂျစ်တယ်ငွေကြေးကိုလည်း အသုံးပြုသည်။ ဒစ်ဂျစ်တယ်ငွေကြေးသည် အီလက်ထရွန်းနစ် စနစ်ဖြင့် သင့်ငွေများကို သင့်ဘဏ်မှ သိမ်းဆည်းပါသည်။ ဒစ်ဂျစ်တယ်ငွေကြေးသည် ငွေသားမသုံးဘဲ ပစ္စည်းများအတွက် ငွေပေးချေနိုင်စေပါသည်။

သင့်ဖုန်း သို့မဟုတ် ကွန်ပြူတာမှတဆင့် သင့်ငွေကြေးများကို ဝင်ရောက် သုံးနိုင်သည်၊ ပလပ်စတစ်ကတ်ကို နှိပ်ရုံ သို့မဟုတ် ပွတ်ဆွဲခြင်းဖြင့် ငွေပေးချေနိုင်ပြီး အွန်လိုင်းတွင် စျေးဝယ်နိုင်ပါသည်။

ဘဏ်စာရင်းဖွင့်ခြင်း

ဩစတေးလျနိုင်ငံတွင် သင့်ငွေကို စောင့်ရှောက်ရန် ဘေးကင်းသော နည်းလမ်းမှာ ဘဏ်စာရင်းတွင် ထားခြင်း ဖြစ်သည်။ သင့်ဘဏ်စာရင်းရှိငွေများသည် သင့်‌ငွေဖြစ်ပြီး ဘဏ် သို့မဟုတ် အစိုးရငွေ မဟုတ်ပါ။

သင့် လခရယူရန် သို့မဟုတ် ငွေတာင်းခံလွှာပေးရန်ကဲ့သို့ နေ့စဉ်ဘဏ်လုပ်ငန်းကိစ္စများအတွက် သင့်ဘဏ်စာရင်းကို သင် အသုံးပြုနိုင်ပါသည်။ သို့မဟုတ် သင်ဝယ်လိုသော ပစ္စည်းများအတွက် ငွေစုနိုင်သည်။

ဘဏ်စာရင်းဖွင့်ရန်-

• ဘဏ်ခွဲတစ်ခုသို့ သွားပြီး အခကြေးငွေ မပေးရဘဲ နေ့စဉ်သုံး (သို့မဟုတ် 'ငွေပေးငွေယူ') စာရင်း ဖွင့်လိုကြောင်း ပြောပါ။
• သင့်နိုင်ငံကူးလက်မှတ် သို့မဟုတ် ယာဉ်မောင်းလိုင်စင်ကဲ့သို့ သင့်အထောက်အထားကို ဘဏ်မှ ကြည့်ရှုရန် တောင်းဆိုလိမ့်မည်။
• ထို့နောက် ငွေစာရင်းတစ်ခု ပြုလုပ်ပြီး သင့်စာရင်းအတွက် အသုံးပြုရန် ငွေလွှဲကတ်တစ်ခု ပေးပါမည်။

ဘဏ်ခွဲတစ်ခုမှ ငွေသွင်းရန် သို့မဟုတ် ငွေထုတ်ရန် သင်၏ ငွေလွှဲကတ်ကို အသုံးပြုနိုင်သည်။ သို့မဟုတ် ငွေထုတ်စက် (Automated Teller Machine - ATM) မှ ငွေသား ထုတ်ယူနိုင်ပါသည်။

အခကြေးငွေ ပေးခြင်း

ပစ္စည်းများအတွက် 'လက်ငင်းရှင်းကတ်' ကို အသုံးပြုသောအခါ၊ သင်သည် သင့်ဘဏ်စာရင်းမှ သင့်ကိုယ်ပိုင်ငွေကို အသုံးပြုနေခြင်း ဖြစ်ပါသည်။ ဘဏ်စာရင်းတွင် ငွေမရှိပါက ဝယ်၍ မရနိုင်ပါ။

'အကြွေးဝယ်ကတ်' ကို သုံးသောအခါ ဘဏ်မှတဆင့် ငွေချေးခြင်း ဖြစ်ပါသည်။ အများအားဖြင့် အတိုးနဲ့အတူ ချေးငွေကို ပြန်ဆပ်ရပါသည်။

ပစ္စည်းများအတွက် ငွေပေးချေရန် သင့်ကတ်ကို စတိုးဆိုင်တွင် ပွတ်ဆွဲနိုင်သည် သို့မဟုတ် တို့ထိနိုင်သည်။ သို့မဟုတ် သင့်ကတ် အသေးစိတ် အချက်အလက်များကို ထည့်သွင်းခြင်းဖြင့် အွန်လိုင်းစျေးဝယ်ရန် သင့်ကတ်ကို အသုံးပြုနိုင်သည်။

ဩစတေးလျနိုင်ငံတွင် အလုပ်လုပ်ခြင်း

သင် သြစတြေးလျနိုင်ငံတွင် အလုပ်လုပ်သောအခါ လစာရပြီး သင် ရရှိတဲ့ဝင်ငွေအပေါ် အခွန် ပေးဆောင်ရပါမည်။ သင့်အလုပ်ရှင်သည် သင့်ငွေအချို့ကို 'ပင်စင်စုဆောင်းငွေ' ('စူပါ') အဖြစ် ပေးပါသည်။

အလုပ်အတွက် အခကြေးငွေ ရယူခြင်း

သင့်အလုပ်ရှင်သည် သင့်လုပ်အားခကို သင့် ဘဏ်စာရင်းထဲသို့ ထည့်ပေးလေ့ ရှိပါသည်။ လခထည့်ပေးပြီးသည့်အခါ 'လစာဖြတ်ပိုင်း' ဟုခေါ်သော လခအကျဉ်းချုပ်ကို သင်ရရှိသည်။ ဤစာရွက်သည် သင်ရရှိငွေမည်မျှ၊ အခွန်မည်မျှပေးဆောင်ပြီး သင်၏ စူပါရန်ပုံငွေသို့ မည်မျှဝင်သည်ကို ပြသသည်။

အခွန်ငွေ

သြစတြေးလျနိုင်ငံတွင် ဝင်ငွေရရှိသောအခါ အစိုးရ (ဩစတြေးလျအခွန်ရုံး) သို့ အခွန်ငွေ ပေးဆောင်ရပါသည်။ သင့်အလုပ်ရှင်က ဤပေးဆောင်မှုကို သင့်ကိုယ်စား လုပ်ပေးပါသည်။ ပြည်သူလူထုအတွက် လိုအပ်သော ဝန်ဆောင်မှုများပေးရန် အစိုးရမှ အခွန်ငွေများကို အသုံးပြုပါသည်။ ဆေးရုံများ၊ ကျောင်းများ၊ လမ်းများနှင့် အများသုံး သယ်ယူပို့ဆောင်ရေး (ဘတ်စ်ကားများ၊ ရထားနှင့် ရထားများ)စသော အကြောင်းအရာများ။

အခွန်ဖိုင်နံပါတ်

သြစတြေးလျနိုင်ငံရှိ လူတိုင်းတွင် ၎င်းတို့၏ ကိုယ်ပိုင် 'အခွန်ဖိုင်နံပါတ်' ရှိသည်။ သင်သည် သြစတြေးလျအခွန်ရုံး (ATO) မှ TFN လျှောက်ထားနိုင်ပြီး ဩစတေးလျနိုင်ငံတွင် အလုပ်လုပ်ရန် လိုအပ်ပါသည်။ သင် အလုပ်စလုပ်သောအခါ သင့်အလုပ်ရှင်အား သင်၏အခွန်ဖိုင်နံပါတ်ကို ပေးဆောင်ရမည်ဖြစ်ပြီး၊ သို့မှသာ ၎င်းတို့သည် အခွန် ပေးဆောင်နိုင်မည် ဖြစ်ပါသည်။

ပင်စင်စုဆောင်းငွေ

ဤငွေသည် အသက်ကြီးလာ၍ အလုပ်နားချိန်အတွက် စုဆောင်းငွေ ဖြစ်သည်။ သင့်အလုပ်ရှင်သည် သင့်အတွက် စူပါရန်ပုံငွေတစ်ခုထဲသို့ ငွေထည့်ရမည်။ သင်၏စူပါရန်ပုံငွေမှငွေများသည် သင့်ငွေ ဖြစ်ပါသည်၊ သင့်အလုပ်ရှင် သို့မဟုတ် အစိုးရနှင့် မသက်ဆိုင်ပါ။

လိုအပ်ပါက အကူအညီရယူပါ။

သင်လိုအပ်ပါက အခမဲ့ အကူအညီ ရရှိနိုင်သည်-

• သင့်ဘာသာစကားဖြင့် အကူအညီရရန် ဘာသာပြန်ခြင်းနှင့် စကားပြန်ခြင်းဌာန TIS National ၁၃၁ ၄၅၀သို့ ဖုန်းခေါ်ဆိုပါ။ သင်အတွက် လိုအပ်သည့် ဝန်ဆောင်မှုကို ခေါ်နိုင်ရန် စကားပြန်တစ်ဦးကို ပေးနိုင်ပါသည်။
• ငွေကြေးပြဿနာများကို ဖြေရှင်းရန် အကူအညီရရန် ၁၈၀၀ ၀၀၇ ၀၀၇ မှတဆင့် အခမဲ့ နိုင်ငံလုံးဆိုင်ရာ အကြွေး အကူဖုန်းလိုင်း (National Debt Helpline) ကို ခေါ်ဆိုပါ။ အကူဖုန်းလိုင်းကို တနင်္လာနေ့မှ သောကြာနေ့၊ နံနက် ၉း၃၀နာရီ မှ ညနေ ၄း၃၀နာရီ ထိ ဖွင့်လှစ်ထားသည်။